Challenging Clients：個案唔合作、帶攻擊性、缺乏界限，如何處理？

今日講吓啲Challenging 嘅Clients。

我接嘅Mild cases 通常唔複雜，Challenging 在小部分Clients 比較唔穩定——可能冷嘲熱諷、充滿敵意、人身攻擊、不斷錄音尖叫、要求隨傳隨到，總括嚟講就係唔合作、帶攻擊性、缺乏界限。

#如果Clients唔合作

喺互動同溝通過程中，專業人士聆聽、引導個案實現Clients 嘅目標。而某啲Clients 拒絕互動同溝通，佢地嘅防禦機制係逃避、避免深入討論，拒絕正面回應任何問題。

面對唔合作嘅個案，我會耐心等待佢願意開口。有時沉默都係好事，佢都需要時間去敞開心扉。尤其係 Passive aggressive 嘅 Clients。我唔會強迫對方配合，亦唔會皇帝唔急太監急，同埋我會記錄佢嘅反應同調整對話模式。

#如果Clients帶攻擊性

至於無禮、帶攻擊性嘅Clients，日常都好有可能對其他人無禮、帶攻擊性。無論佢有人格障礙、情緒唔穩定或純粹粗魯，我都希望用同理心去面對，探索佢嘅情緒同態度都有機會令佢更進一步了解自己、改善關係。

但如果佢威脅同攻擊到我或其他同事，就會考慮終止提供服務並轉介俾其他專業人士。我知有啲Organizations 崇尚「顧客永遠是對的」嘅宗旨，但我覺得Respect is earned，互相尊重先可以建立到信任關係，我亦唔會推啲幫我手或同我合作嘅同事硬食妥協。

#如果Clients缺乏界限

缺乏界限通常係最容易發生、最容易處理嘅事——建立信任關係後，Clients 可能喺服務範圍外嘅時間、地點要求提供服務，或者想相約喺辦公時間外聚會。

為設定明確嘅道德界限，我都會盡量避免被過度依賴，同埋嘗試減少Clients 超越界限嘅好奇心。我再三強調，如果成為朋友，道德上就唔會再親自處理個案，我嚴謹地設定同維繫呢個Boundary。