冷暴力去懲罰同迫人就範之外，仲有更多有毒行為

上次講咗少少「嗌交後當對方係空氣，原來都係有毒行為」，好多讀者都DM話有同感！

「我媽由細到大都係咁對我，我今年31歲，佢都一定要我求佢原諒先肯理我。如果佢心情唔好時同佢講嘢，佢會因為自己嬲緊而嬲埋我，跟住又幾日唔理我。」

「我男友直頭講明呢個禮拜唔會理我，令我自己反省自己做錯咩。如果我氹佢，佢都會當我唔存在。後來佢直頭話當呢個星期冇女朋友，出咗去媾女。」

「我老婆唔只唔理我，直頭沒收我信用卡同八達通，叫我氹返佢之前唔洗旨意攞返。氹完好返一陣，佢都會突然話嬲緊而扣起我啲錢，唔俾我出街見人，但又唔同我講嘢。」

直接無視去懲罰、控制，直至對方道歉、就範。

仲有一個讀者分享，幾次遇到矛盾衡突，佢想坐低傾，男朋友都會直接買嘢俾佢。有時係佢想要好耐、存錢幾個月買嘅貴重禮物，有時隨機嘅食物飲品裝飾品。

男朋友話買嘢就會解決負面情緒，收咗禮物就唔可以再唔開心。如果提起件事，男朋友就會大發雷霆，大叫「我控制唔到自己做啲乜㗎！」，再唔理佢幾日。

佢想分手，男朋友都會用同一招留住佢，已經拖拖拉拉五六年，最近終於覺得男友一直當送禮係一場交易，再靠恐嚇同控制去解決問題。