嗌交後當對方係空氣，原來都係有毒行為

好多有毒關係個案都係後知後覺，可能關係走到尾聲來先知「原來呢個行為有毒」，原來唔係常態。唔一定係浪漫、親密關係，家庭同朋友關係一樣。

讀者好驚訝：「以前從來唔知嗌交後幾日都當對方空氣呢件事係有問題。」

一直以為「嗌交後沉默幾日、幾個月」係正常，因為阿媽每次鬧完佢都當佢透明，甚至當正從來冇存在過。唔係幾個鐘內嘅事，係企喺佢面前都當睇唔到。

到阿媽自己「下咗啖氣」，佢會若無其事咁買盒燒味返屋企加餸。如果佢喊，阿媽就會話佢唔正常，自己學吓控制情緒。最嚴重一次係，同一屋簷下兩個半月冇對望、講過半句嘢。

讀者長大後經常自責，伴侶每次用Slient treatment，幾日唔同佢講嘢，佢都會覺得係自己做錯，先乞求對方原諒，然後嘗試做自己嘢，當自己冇拍拖。等到一日「無啦啦回復正常」，成件事就好似冇發生過。

曾經佢想同伴侶傾吓，對方反問：「有咩好傾？都冇事。」佢就會匿埋一個喊去「控制情緒」。

同佢傾完後，佢好驚訝，一直以為所有人都係咁處理爭執、矛盾。