「雖然難聽，但我都係講事實。」

難聽就係事實？

「你份人真係好自私，我都係講事實。」

「你蠢過隻豬，我都係講事實。」

「你冇安全感又麻煩，我都係講事實。」

消極時以為自己講緊心底話，嗌緊交由情緒主導，自動扭曲記憶同負面描繪事件，作出唔準確嘅指控，但用一句「都係講事實」去包裝。

直率講嘢可以好難聽，但未必係真相。份人幾直都好，唔代表準確地講緊事實。

就算平靜、反思自己嘅行為動機、背景同關係變化，都唔一定係講緊事實。何況係嗌緊交，反而好多時比事實更殘酷。

嚴厲唔代表誠實，惡意亦唔代表直率。被憤怒影響而產生偏見，嗰一刻以為直率表達自我，其實指控、責備都唔恰當。

就當佢真係好自私、愚蠢、冇安全感又麻煩，都可以用更有建設性嘅方式表達同解決問題。同埋你係想講事實，定想表達自己唔耐煩、消極倦怠、感覺受傷、抨擊對方去保護自己？

被情緒扭曲觀點，被強烈感覺掩蓋真相，混淆事實同負面情緒，收唔返最難聽嘅說話，通常令情況變得更差。

事實可能真係殘酷，都可以喺情緒最強烈時先沉澱一下，仔細思考，通常都會發現更深刻嘅真相。停一停，諗一諗，嗰吓停係真係好有用，練習靜觀更容易喺重要關頭先停低，反應前先問吓自己：「乜真係事實真相咩？」