伴侶係迴避型依戀者，定係你自己情緒動盪又不安？

久唔久收到讀者來信話佢地嘅伴侶似乎係迴避型依戀者，因為伴侶避免親密關係。佢地擔心伴侶太脆弱，急於幫佢地修補兒時創傷。

迴避可能真係基於恐懼同焦慮，驚親密關係、身份認同危機，偽獨立，覺得有親密需求係羞恥事；亦可以失去興趣、習慣吹毛求疵，或者冇新鮮感就覺得悶。

留意對方嘅狀態，有時比起重新定義愛同自己嘅感受更輕易，於是讀者係咁諗——對方有咩感覺？佢諗緊乜？佢想要咩伴侶？佢想我點配合？佢真係愛我嗎？

對方「迴避」可能只為咗喺關係中感覺更安全，喺親密同自主感中取得平衡，未必真係刻意疏遠同不屑一顧，而不斷接近對方去獲得安全感而導致情緒動盪、不安嘅係自己。

望自己比望人地其實更需要勇氣。

不如我問返你——咁你有咩感覺？你諗緊乜？你想要咩伴侶？你想佢點配合？你真係愛佢嗎？

如果再問落去——你覺得段關係真正適合你嗎？你做緊對自己最好嘅事？你不安焦慮嘅源頭係邊？

問問吓，大家都不知所措，可能真正迴避嘅人係自己，可能自己先係遠離真愛、怕自己唔值得真正理想同適合嘅人。脆弱嘅人，原來係自己。