情人節，考驗對方有幾愛自己嘅日子

好多情侶都當二月十四號係Relationship Test Day——考驗對方有幾愛自己、幾重視關係。

如果你對情人節有特別期望，強烈地渴望一束玫瑰同一餐Fine dining。你可能擔心今日唔夠完美，擔心自己失望、嬲、受傷。如果對方唔夠努力，就怕佢唔夠愛你、唔夠欣賞同尊重你。

我知好多人未必嚴苛地要求情人，但心底點都希望對方做啲嘢重視自己、送份禮好好慶祝。就算口裡說唔收花，都希望佢偷偷準備小驚喜。

不知不覺地測試對方有幾愛自己，唔係出於惡意，都唔係想段考驗段關係，但始終唔識表達自己嘅需求。

我理解渴望被愛嘅感受，但用情人節一日嘅表現去衡量愛好危險。如果考驗失敗，情人節表現唔合格，責備抱怨後，雙方都覺得不被愛、不被欣賞。

情人節發生期望落差，通常唔係關於缺乏愛，而係真係期望落差——例如透過給予「自己想送嘅禮物」，而唔係給予「對方真心想收嘅禮物」去慶祝。

因為大家對情人節嘅定義同要求唔同，事前冇清晰傳達過自己嘅期望。

情人節唔會令乏味關係變有趣，唔會令有缺陷嘅伴侶變完美。伴侶本身唔知你想點，情人節都唔會知，其實大部分人都唔知自己嘅伴侶想點，除非曾經清楚表達需求。

暗示想要驚喜其實唔夠，講明想要咩反而可以一齊享受。

你可能覺得「講到咁白咪好冇癮」，同埋「冇驚喜咪唔浪漫」，其實失望同受傷嘅感覺係更冇癮更唔浪漫。除咗表達自己想點，不如試吓趁機會問：「你想今日做咩活動？你想今晚食咩啊？」早啲一齊預備，一齊唔追求完美，自然減少關係壓力。

既然大家都唔完美，就試下多啲欣賞彼此點樣唔完美地表達愛意，祝大家情人節快樂。