為防止分手同離婚先去Therapy，一星期見幾個治療師

接觸過唔同Clients ——有啲見過社工、見過精神科醫生、見過唔同類型治療師。有人一星期見四、五個唔同醫生同治療師，有人試過一兩次輔導就停咗，有人唔相信治療但被說服先一試，好多都係為咗防止分手或離婚。

關係始終走向末路，不惜一切都搵「可防止分手同離婚」嘅治療方法。咁究竟治療可唔可以防止分手同離婚？

現實啲諗，你去治療係為咩？而治療本身係咩？

想解決關係中嘅問題？搵一個中立嘅人聽你分享？唔知點提起困擾你嘅事情？

你同伴侶經常不和但冇解決辦法？同伴侶價值觀截然不同？情感同身體上早已缺失親密感？你好嬲好沮喪又避免緊同伴侶接觸？掙扎緊婚禮或育兒、工作、金錢嘅事？有婆媳問題、出軌背叛、信任問題？

「我唔想以後後悔，但我唔知點做，所以先去治療。」因為唔知點做，所以迫使自己同伴侶去見治療師，呢種情況都比想像中常見。

亦見過有人係因為「佢做錯事，我原諒唔到，所以搵治療師評理。」對方以為自己被伴侶夾去校長室，自然唔想配合。

如果去治療係一種責備或懲罰，冇人會真正願意同治療師會面。如果去治療純粹為咗唔分手唔離婚，強行拉伴侶去治療師度說服對方都冇好結果。治療唔係容易同舒適嘅事，可能會觸碰到大家唔舒服、唔鍾意提起嘅話題，更可能最後發現其實結束關係先係對自己更好嘅事。

當治療係為咗學新嘅技能去改善關係，分享深刻嘅感受，管理強烈嘅情緒，誠實地脆弱同勇敢，學習表達同理解、原諒同道歉，令大家重新振作，專注自己、關係同未來嘅目標，咁治療就有成效。

治療師嘅工作唔係為你修復或結束關係，而係保持中立幫你同伴侶安全、誠實咁探索關係。至於點先搵到好治療師，我諗每個人嘅標準唔同。我覺得搵到有條理、有同理心又有經驗嘅人已經好難得。