疫情唔只改變生活環境同工作，仲改變人格

雖然疫情已經維持一段時間，喺香港戴口罩出入都習以為常，等去旅行又係集體進行中，大家慢慢「如常生活」，但好多人的確喺呢段時間失去家人、工作、主要收入。

我諗好多人都同意疫情期間，大部分人都冇以前咁外向、隨和同開放。我地對他人表達同情同善意嘅能力下降，冇以前咁願意參與新活動，亦冇咁傾向尋求同享受他人陪伴，好多人事業上一直冇進展而失去上進心。

之前睇咗篇近期嘅心理學研究報告都證實咗呢個觀點——七千幾個實驗參與者喺2014年起同2021至2022年期間人格有變化，研究喺五個維度上衡量人格，包括外向定內向，神經質定情緒穩定，開放定封閉，隨和定敵對，盡責定無責任心。

實驗結果總括就係大家更內向、神經質、封閉、敵對、無責任心，疫情創傷的確加速人格變化嘅自然過程（性格本身會隨年齡增長而有一定變化，去適應衰老同有效地應對生活）。仲有好多人重返社會同學校有社交焦慮，唔敢除口罩，遺憾錯過兩年正常生活。

雖然勤洗手、用酒精搓手液，留意飲食又做運動，但心理健康同幸福感顯著下降，所以性格都有改變。我覺得好正常啊，畢竟大家長期面臨困難，自由受限制，收入有損失，仲要面對疾病、死亡。