簡單判斷我個Therapist 好唔好？

之前詳寫過一篇相關文章（詳見Patreon），今日收到讀者DM 問就再簡單答，點樣簡單判斷治療師好唔好？我覺得最能夠判斷一個治療師嘅好壞，就係安全感同信任感，同埋有冇達成治療目標同共識。

第一次去Therapy 當然有啲緊張同唔舒服，要同陌生人講私密細節唔容易，講出最黑暗、最羞恥嘅秘密都真係需要勇氣。如果你嘅治療師善解人意地專心聆聽，你開始相信治療有用，就係一個Good start，呢個都可能係適合你嘅治療師。

當你願意放低面具、展示你嘅脆弱，呢一刻，佢已經係一個唔錯嘅治療師。全心全意相信一個人比想像中困難，你願意積極展現最真實嘅自己，你都非常努力，相信佢都會積極回應你。

如果治療師仲接受你、關心你嘅價值觀、有意識地同你聯繫，咁佢就係一個好嘅治療師，呢幾樣嘢都係我做Therapy 好著重嘅要點，治療唔係純粹傾計，亦唔係齋呵齋氹，而係以Client 嘅核心價值同目標為中心，有意識地建立連結。

當你有進步、完成治療目標，而佢有提供直接同有效嘅指導，令你感覺更自覺、更開放、更積極，明顯地感受到正面嘅改變，咁恭喜你，你遇到一個好好嘅治療師，你自己都會感受到。

好唔好，其實好主觀。如果覺得唔夠好，唔緊要。人夾人，唔同治療師嘅Approaches 都唔同，試多幾個，可能唔同性別、背景、設定，總會搵到一個適合你嘅治療師。