被第三者騷擾同威脅，向治療師求救去舒緩負面情緒

凌晨有個讀者Sent 咗五十幾個私訊俾我，佢收到第三者嘅威脅同騷擾訊息，仲有疑似床照、情慾對話，封鎖極都收到新訊息。對方毫不忌諱咁用自己帳號、分身、朋友帳號係咁留言、私訊，連自己啲Foodie IG 同LinkedIn 都收埋呢啲訊息。

讀者不知所措又情緒波動，我諗未遇過呢種情況嘅人好難想像有幾恐怖、驚嚇，或者未必相信世上真係有人咁做。唔好話網民，真實識嘅朋友同我自己都有被騷擾嘅經歷。

第三者嘅動機好明確，唔只想影響呢段關係，最想影響出軌嘅人。雖然網絡世界咩都唔出奇，但好少人無緣無故走去起底，用完真身再開十幾廿個分身騷擾人。主動攻擊，可能因為自己都好受傷。

對方點先肯罷休？通常直到目標達成，或者被騷擾方完全隱密哂所有帳號，被跟縱就申請埋禁制令，對方覺得「已經盡力令自己好過啲」就會慢慢停止。

呢個時候有自己嘅Support system 好重要，我一直記得當時邊個陪我渡過，邊個同我講「啲人無聊姐」就敷衍帶過，邊個加鹽加醋當八卦周圍唱。件事結束多年，仍記得一清二楚，所以呢個都係睇清楚身邊人嘅好時機。

至於自己點舒緩負面情緒，我覺得盡量Private 所有嘢，放低部電話，專注處理伴侶或前度出軌嘅事實，無論繼續定結束關係，記住世界好大，人生可以好長，好多事情放低一排就會過去。